ब्रह्मसूत्रभाष्यम्/C03/S02/A037

स्थानविशेषाधिकरणम्

परानन्दमात्रत्वे कथं ब्रह्माद्यानन्दादीनां विशेष इत्यत उच्यते –

ॐ स्थानविशेषात् प्रकाशादिवत् ॐ ॥ 35-358 ॥

यथाऽऽदित्यस्य दर्पणादिस्थानविशेषात् प्रतिबिम्बविशेष एवमानन्दादेरपि ।

‘ब्रह्मादिगुणवैशेष्यादानन्दः परमस्य च ।
प्रतिबिम्बत्वमायाति मध्योच्चादिविशेषतः’

इति वाराहे ॥ 35 ॥

ॐ उपपत्तेश्च ॐ ॥ 36-359 ॥

‘ऐश्वर्यात् परमाद्विष्णोर्भक्त्यादीनामनादितः ।
ब्रह्मादीनां सूपपन्ना ह्यानन्दादेर्विचित्रता’

इति हि पाद्मे ॥ 36 ॥